RSS
 

كورسات اللينكس المتقدمة

15 Jul

السلام عليكم

بدايه القصه .. بدأت القصه صراحه لما فكرت فى اكتر من نقطه تتعلق بالتدريب الخاص باللينكس خاصه الى كنت بديه فى المنصوره ووجدت الاتى

اولا ان المنصوره هى من اكثر الاماكن الى منتشر فيها اللينكس بين طبقه الطلبه وكمان اقامه نشاطات متعلقه باللينكس هناك . وده طبعا بفضل ربنا سبحانه وتعالى ثم بفضل ناس بدأت المسيره فى المنصوره ونذكر هنا احمد سليمان وكمان بفضل الكات وتواجدها

ان الفتره الى كنت بدى فيها كورسات فى المنصوره كنت بلاقى تجاوب من معظم الناس الى فى الكورسات انها تتعلم وتبقى ناس كويسه وده اصلا سبب نجاح النقطه الاولى

ان الطلبه فاقده الامل فى الجامعه وانهم يتعلموا منها حاجه تفيدهم فبيطوروا نفسهم مع نفسهم علشان يلاقوا لنفسهم مكان تحت الشمس على عكس الوضع هنا فى بعض الجامعات فى القاهره

نقطه كمان تتعلق بالشباب فى المنصوره . انه مش سيس اوى الصراحه

كل الى فات دى نقاط ايجابيه خلتنى افكر تانى واقول ان باستغلال النقاط  دى افضل ممكن نطلع مستوى احسن من المنصوره وناس خبرتها احسن . مش علشان بس المنصوره بلدى وبحبها لاكن كمان للاسف طالب جامعه المنصوره محتاج حاجات كتير اوى تدعم موقفه للشغل فى القاهره مثلا عن شباب جامعات القاهره والجامعه الامريكيه وخلافه ودى نقطه انا عانيت منها ولمستها

فمن هنا فكرت انى  ادى كورسات مختلفه فى اللينكس واعلنت عنها قبل كده وشرحت وجهه النظر من وراها لاكن للاسف لقيت ان الاقبال يكاد يكون شحيح فاضريت افكر تانى ايه السبب وحتى اكلمت مع صحابى واستخلصت ان المشكله ممكن تكون فى عدم استعداد الناس للكورسات دى يعنى ينقصها المعلومات الى قبلها . وخوف الناس من الكورسات دى  وتخيلهم انها مرعبه . وعدم معرفه الناس ايه الفائده من  ورا الحاجات دى

بالثلاث اسباب دول بدات افكر فى الحل . لقيت ان ممكن الحل يكون فى انى ارجع لدرس الكورسات الاساسيه الاول وفيها احل الثلاث مشاكل دول ومنها انطلق للكورسات المتقدمه . على الرغم من انى بصراحه عارف ان كثير من الناس عندها بس مشكله الخوف اما المعلومات والفائده فهى متوفره عندهم كويس

لذلك انا فكرت ان تكون الكورسات بالترتيب ده

Redhat Linux Essentials RH033

Redhat Linux System Administration RH131

Redhat Linux Networking and Security Administration rh253

Redhat Enterprise Directory Service and Authentication RH423

Redhat Enterprise Clustering and Storage Management RH436

RHCA Track ولو ده حقق نجاح ممكن نكمل بقيت الكورسات بتاعت ال

شباب انا مش عارف اذا كان تحليلى للمشكله صح وحلى ليها صح ولا فيه افكار اخرى . فياريت لو حد عنده  رأى يشاركنى بيه حتى لو كان مش هيشارك فى الكورسات

ayman@aymantaher.netاما لو حد عايز يشارك فى اى كورس من دول يبعت لى ميل ويحدد فيه هو عايز ايه على

السلام عليكم

 
1 Comment

Posted in IT News

 

اكتشف نفسك

06 Jul

السلام عليكم ورحمه الله وبركاته

بصراحه يا جماعه انا ما كنتش مخطط لحاجه غير انى كنت بفكر مع نفسى فى موضوع اخد منى 10 دقائق كده فقلت اشارك الناس بيه ممكن حد يضيفلى حاجه او اضيف لحد حاجه ونستفيد كلنا . بالاضافه اكتب حاجه على البلوج بدل ما هو فاضى كده

فى البدايه عايز اقول شويه ثوابت وهى :-

انا متاكد ان الناس اشكال وانواع والناس فيها اختلاف عن بعض وده شئ مقبول ومن سنن الله فى الكون
ان الانسان نادر التفكير فى عيوبه علشان كده ممكن يكون مش مقدر عيوبه صح
ان الانسان غرور بطبعه ولو سمع نقد بيعتبره هجوم ويبدا يرفص
ان الانسان صعب التغيير فى طباعه . ودى انا متأكد منها اوى لانى ساعات بحاول مع نفسى وبجد صعوبه بالغه . لاكن فى النهايه هى مش مستحيل
ان الدين النصيحه . وسيدنا عمر بن الخطاب الى اتصف بالعدل والقوه والحق وكل الصفات قال ” رحم الله امرأ اهدى الى عيبوى ” فهو اعتبرها كهديه
ان اكيد كلنا فينا عيوب

من شويه الثوابت دى اعتقد ان انت اخذت بالك من الى انا كنت بفكر فيه . ببساطه يا جماعه انا ساعات “وهنا انا هنسب الكلام لنفسى” علشان ما حدش ياخد الكلام عليه . ساعات كتير بلاقى ان فلان بيعمل مثلا حاجه غلط وانتقده ولاقى نفسى بعملها برضه . وساعات كتير تلاقيك بتخسر علاقات واصدقاء وانت مش عارف ليه وايه السبب وفى معظم الحالات توصفهم بالخيانه وانهم واطيين . ومعاك ان ده ساعات بيحص بس ساعات برضه بيبقى ده السبب الى نفسك قالته ليك

لكن الفكره ببساطه ان كل واحد فينا فيه عيوب ومع العيوب دى ممكن تكون شخصيه عنيده .طب ايه المانع انك تقعد مع نفسك وتهدى اعضائك وتاخد نفس عميق وتصفى قلبك لنفسك وتتهم نفسك وتلومها وتفكر فى عيوبها بعنف  وشده وفى نفس الوقت من غير عصبيه ومن غير تعصب ومن غير ما تلوم الاخريين ومن غير ما تحط اسباب واهيه . بس فكر فى الى بيعمله الناس ويدايقك وابدأ شوف انا بعمله ولا لأ . فى البدايه ممكن تقتنع انك مش بتعمله بس افتكر انا قلت لك فكر بعمق . هتلاقى صدقنى بلاوى متلتله . وافتكر انك قلت على فلان انه عصبى وبالفعل انت كمان عصبى . قلت عليه انه مش بيسمع للغير وانت كمان مش بتسمع للغير بس مش واخد بالك . قلت عليه انه بيحب مصلحته بس وانت كمان بتستقتل علشان مصلحتك بس . وارجوك بلاش تفتكر موقف واحد وتجيب له عذر علشان ده عاده الى بيحصل . ولو كنت زى حلاتى عند مشكله فى التذكر ابدأ تابع نفسك فى الايام الجايه وبعد كل موقف كده قيم نفسك وشوف العيب وهتلاقى بلاوى

اكيد طبعا ممكن تقول ان دى شخصيتى وانا مختلف على الناس . هنا هنرجع للمسلمات الى فى الاول . نعم كل واحد كان ليه شخصيه بس هلى من مكونات الشخصيه العيوب . لا طبعا . وممكن يكون فيه عيوب بس انت مطالب انك تمحى العيوب دى ولو فضلت ساكت عليها تأثم مرتيين للمعرفه . واستغرب اوى من الى يقول لك بص يا عم انا كده مش عارف اغير من نفسى وانا كده عاجبنى كده . ولو مش عاجبك اعمل الى انت عايزه وكده . ده كده بيزيد الازمه الى موجوده وهيشيلك ذنب لو كان حقيقى الى فيك ده عيب يؤذى الاخريين . وتذكر دايما ان الصحابه اتغيروا بين يوم وليله . وازاى ان كان فيه اكتر من 100.000 صحابى كلهم مشهود لهم بحس الخلق والطباع وخلى بالك مع اختلاف الشخصيات

الايات كتيره والاحاديث والمواقف ولا اخفى عليكم سرأ انا مش متمكن اوى من حاجه زى كده ومش متذكر النصوص . واعتقد انى  مش المفروض اجيب مثال واحد هنا حتى لان كل واحد فينا المفروض اعتقد عنده قدر غير قليل فى الموضوع ده

اخر حاجه علشان مش اطيل . هو ان كل واحد بيكلم ويقول الناس بقت زى الزفت والطباع زى الزفت ويقول ياما ويعيد . ويجى واحد تانى من الناس دول ويقول نفس الكلام على الناس . ويجى واحد من الناس التانين دول ويقول نفس الكلام . يعنى على كده بقى فين الناس الوحشه بالزبط . اكيد احنا كلنا زفت وعلشان كده ما تستثنيش نفسك وفتش جوه نفسك وغير بالفعل . وبطل تبوص على انك واحد وفيه ناس تانين . وواحد من الناس التانين شايف نافسه واحد وحط ضمن الناس التانين . كده كلنا هنرمى على الناس التانين الى هم بالمنطق ده مش موجودين ونفضل فى خيص بيص

انا متشكر لكل الى قرا للاخر . انا عارف انى مش شاطر فى النوع ده من الكتابات ومش محضر للموضوع . بس هى خاطره قلت اشارك الناس بيها

سلام

 
4 Comments

Posted in My Space

 

New Sprint

01 Jul

بسم الله الرحمن الرحيم

السلام علكيم جميعا . غيبه طويله والله انا عارف وتلاقى ناس بتقول ياااه ده فين من زمان صحيح . وايه ده هو رجع تانى . وناس تقول هى شغلانه بقى ما ترسالك على بر . وفيه قله منحرفه كده هتقولى الف مبروك يا باشا وكيب ات اب . لكل هؤلاء بقول انا اسف على الانقطاع الفتره الى فاتت . طبعا عندى كتير عايز احكيه عنى وعن الشغل وعن حاجات كتير . واللى ناوى ان شاء الله عليه الفتره الجايه هو انى اكلم عن الفتره الى فاتت وعنى اى حاجه اتعلمتها وعن اى حاجه صادفتها لعل وعسى انها تقصر المسافه على حد قرأ حاجه معينه هنا . لان احنا المفروض ان شاء الله نكمل بعض مش ننقص من بعض

طبعا حاجه من الى انا متاكد ان فيه ناس هتقولها ان شويه وهيبطل والناس كلها بتعمل كده . لاكن انا مستعين بالله ان شاء الله انى استمر واملى ان ربنا يعينى ان شاء الله

الى عاملهم فى البلوج وهم   categories الغرض من البلوج دى صراحه بيتلخص فى الاربع

My Space —> ودى ان شاء الله هكتب فيها اح حاجه متعلقه بيا شخصيا اوى حاجه اتعلمتها او صادفتها وممكن تنفع الغير . واعتقد فى الجزئيه دى عندى بلاوى كتير اوى الفتره الى فاتت ممكن تملا البلوج كله

Linux/Unix —> وهنا مواضيه كلها خاصه باللنكس واليونكس . وهتبقى بالانجليزى لان الفكره اصلا جت لى من ان انا طول اليوم عمال اجيب حلول وافكار من بلوج ناس تانيه طب ما المفروض كمان اعمل زى الناس دى واى حاجه اشوف انها مفيده للناس كلها احطها واتمنى انها تساهم فى نشر حاجه تساعد حد فى يوم من الايام . بالذات لما بيبص على الاسم والبلد زى ما احنا بنعمل برضه ميلاقى انه مسلم وعربى

IT News —> وهنا مواضيع متفرقه خاصه باى اخبار متعلقه بالكمبيوتر

CAT Updates —> وده انا عامله علشان اغصب نفسى انى اتابع اخبار الكات علشان احطها هنا وبالتالى هشارك فيها . يعنى دى ورك اروند

اخيرا ادعولى بالتوفيق . واتمنى اشوف مشاركاتم معايا علشان اتشجع شويه . وكمان المواضيع ان شاء الله بالعربى ماعدا التقنى منها

ملحوظه . الثيم ده مش النهاائى انا لسه بدور على واحد كويس

سلام عليكم جميعا

 
17 Comments

Posted in My Space